Cyn-archwilio

Cynnwys

Paratoi ar gyfer y cam archwilio

Y cam cyn-archwilio yw'r adeg pan fyddwn yn paratoi ar gyfer archwiliad. Mae'r Awdurdod Archwilio'n cynnwys un neu fwy o arolygwyr a fydd yn cynllunio ar gyfer y cam archwilio.

Bydd yr Awdurdod Archwilio'n gwneud asesiad cychwynnol o'r materion y bydd angen eu trafod.

Bydd yr Awdurdod Archwilio yn:

• cynllunio beth fydd yn digwydd yn ystod yr archwiliad
• trefnu unrhyw wrandawiadau
• gosod terfynau amser drafft ar gyfer sylwadau

Cofrestru i leisio'ch barn

Mae'n rhaid i chi gofrestru yn ystod y cam cyn-archwilio i leisio'ch barn.

Bydd y cyfnod cofrestru ar gyfer pob prosiect ar agor am 28 niwrnod o leiaf i roi amser i chi gofrestru. Bydd y dyddiad cau ar gyfer cofrestru yn cael ei nodi yn hysbyseb yr ymgeisydd, neu fe allwch wirio tudalen y prosiect ar y wefan hon. Gallwch wneud hyn trwy glicio ar y ddolen Pob prosiect ar frig y dudalen hon a chwilio am y prosiect.

Mae canllaw ar wahân ar gael sy'n cynnwys rhagor o wybodaeth am gamau'r broses ar gyfer pobl neu sefydliadau sydd eisiau lleisio'u barn am brosiect seilwaith cenedlaethol.

Cyfarfod rhagarweiniol

Bydd yr Awdurdod Archwilio'n cynnal cyfarfod rhagarweiniol rywbryd ar ôl i'r cyfnod cofrestru i leisio'ch barn gau.

Sawl wythnos cyn y cyfarfod hwn, anfonir y llythyr rheol 6 at bawb a gofrestrodd i leisio'i farn, cyrff swyddogol a phobl yr effeithir ar eu tir yn uniongyrchol. Mae'r llythyr rheol 6 yn dweud wrth bawb pryd a ble y bydd y cyfarfod yn cael ei gynnal. Bydd hefyd yn cynnwys amserlen ddrafft ar gyfer yr archwiliad.

Ni allwch roi eich barn am y datblygiad arfaethedig yn y cyfarfod hwn.

Gallwch sôn am y canlynol:

• unrhyw beth a allai effeithio ar eich gallu i fynychu gwrandawiadau neu fodloni terfynau amser, er enghraifft digwyddiadau lleol eraill sy'n cael eu cynnal ar yr un pryd neu faterion yn ymwneud â theithio neu batrymau gwaith
• a oes unrhyw fannau lleol addas i gynnal unrhyw wrandawiadau a allai fod yn ofynnol
• a oes unrhyw grwpiau o bobl y mae arnynt angen ymagwedd wahanol i allu cymryd rhan yn y broses
• unrhyw faterion eraill sy'n ymwneud â'r amserlen archwilio ddrafft

Beth fydd yn digwydd nesaf

Byddwn yn cyhoeddi nodiadau'r cyfarfod a recordiad yn adran y prosiect ar y wefan hon oddeutu wythnos ar ôl y cyfarfod rhagarweiniol.

Anfonir y llythyr rheol 8 at bawb a gofrestrodd, yn ogystal â chyrff swyddogol a phobl yr effeithir ar eu tir yn uniongyrchol. Mae'r llythyr hwn yn rhoi manylion am yr archwiliad, gan gynnwys yr amserlen derfynol gyda'r holl derfynau amser ar gyfer cyflwyno sylwadau i'r archwiliad.

Cyngor manylach

Gallwch ddod o hyd i gyngor manylach yn ein tudalennau cyngor.

Nesaf Archwiliad

Rhan o Y broses ar gyfer Prosiectau Seilwaith o Arwyddocâd Cenedlaethol (NSIPau)

1. 1 Cyn-ymgeisio

   Dyma'r adeg pan fydd yr ymgeisydd yn dechrau creu ei gais. Mae'n ofynnol i'r ymgeisydd ymgynghori â phobl a sefydliadau yn yr ardal. Mae'n rhaid iddo hefyd greu dogfennau manwl ynglŷn â'r effaith y gallai'r prosiect ei chael ar yr amgylchedd.

   Mae'n bwysig cymryd rhan yn ystod y cam hwn er mwyn dylanwadu ar y cais cyn i'r ymgeisydd ei anfon at yr Arolygiaeth Gynllunio.

   1. Dysgwch beth allwch chi ei wneud yn ystod y cam hwn a gwiriwch ein canllawiau manwl.

2. 2 Derbyn

   Dyma'r adeg pan fydd yr ymgeisydd yn anfon ei ddogfennau cais atom. Byddwn yn gwirio a allwn dderbyn y cais i'w archwilio. Mae gennym 28 niwrnod i wneud y penderfyniad hwn.

   1. Sut mae'r cam derbyn yn gweithio a beth fydd yn digwydd nesaf.

3. 3 Cyn-archwilio

   Penodir Awdurdod Archwilio sy'n cynnwys un neu fwy o arolygwyr. Mae'n rhaid i unrhyw un sydd eisiau lleisio'i farn allu cofrestru yn ystod y cam hwn.

   Mae'n rhaid i'r ymgeisydd gyhoeddi bod y cais wedi cael ei dderbyn gennym. Bydd yn cynnwys pryd a sut y gall partïon gofrestru i gymryd rhan. Mae'r cyfnod ar gyfer cofrestru'n cael ei osod gan yr ymgeisydd, ond mae'n rhaid iddo beidio â bod yn llai na 28 niwrnod.

   Mae'r cam cyn-archwilio'n cymryd oddeutu 3 mis fel arfer.

   1. Beth sy'n digwydd yn ystod y cam cyn-archwilio.

4. 4 Archwiliad

   Bydd yr Awdurdod Archwilio'n gofyn cwestiynau am y datblygiad arfaethedig. Gall yr ymgeisydd ac unrhyw un sydd wedi cofrestru i leisio'i farn gymryd rhan a chyflwyno sylwadau erbyn pob terfyn amser yn yr amserlen. Gallwch hefyd fynychu gwrandawiadau a allai gael eu cynnal. Mae'r cam hwn yn cymryd hyd at 6 mis.

   1. Beth sy'n digwydd yn ystod y cam archwilio?

5. 5 Argymhelliad

   Mae'r Awdurdod Archwilio'n ysgrifennu ei adroddiad argymhelliad. Mae'n rhaid i hwn gael ei gwblhau a'i anfon at yr Ysgrifennydd Gwladol perthnasol o fewn 3 mis o ddiwedd y cam archwilio.

   1. Gwneud argymhelliad.

6. 6 Penderfyniad

   Y cam penderfynu yw'r adeg pan fydd yr Ysgrifennydd Gwladol perthnasol yn adolygu'r adroddiad ac yn gwneud y penderfyniad terfynol. Mae ganddo 3 mis i wneud penderfyniad.

   1. Pwy sy'n gwneud y penderfyniad terfynol.

7. 7 Beth sy'n digwydd ar ôl i'r penderfyniad gael ei wneud

   Pan fydd yr Ysgrifennydd Gwladol wedi gwneud penderfyniad, gellir cyflwyno heriau i'r Uchel Lys. Mae'n rhaid dilyn yr holl weithdrefnau wrth gyflwyno her. Bydd yr Uchel Lys yn penderfynu a oes sail ar gyfer adolygiad barnwrol.

   Mae'n rhaid i hyn ddigwydd o fewn 6 wythnos.

   1. Yr hyn y gallwch ei wneud ar ôl i'r penderfyniad gael ei wneud.