Lleisio'ch barn yn ystod yr archwiliad o'r cais

Cynnwys

Yr hyn y mae archwiliad yn ei olygu

Y cam archwilio yw pan fydd yr Awdurdod Archwilio'n edrych ar y prosiect arfaethedig ac yn gofyn cwestiynau.

Gall yr ymgeisydd, unrhyw un sydd wedi cofrestru i leisio'i farn, ac unrhyw un arall sy'n ymwneud â'r prosiect wneud sylwadau ar y datblygiad arfaethedig neu ateb unrhyw un o'r cwestiynau erbyn pob terfyn amser.

Gwneir hyn yn ysgrifenedig fel arfer. Bydd yr Awdurdod Archwilio'n creu ac yn cyhoeddi dogfen sy'n cynnwys ei gwestiynau. Gallai'r archwiliad gynnwys gwrandawiadau hefyd os oes materion y mae angen eu trafod yn fanylach.

Bydd yr Awdurdod Archwilio'n anfon amserlen atoch sy'n cynnwys dyddiadau pob terfyn amser ar gyfer anfon eich sylwadau. Bydd yr holl sylwadau'n cael eu cyhoeddi ar y dudalen gwybodaeth am y prosiect ar y wefan hon ar ôl iddynt gael eu derbyn.

Sut i wneud sylwadau yn ystod archwiliad

Bydd holl ddogfennau'r prosiect, yr holl sylwadau gan bobl eraill sydd wedi cofrestru neu sydd â hawl statudol, a holl gwestiynau'r archwiliad yn cael eu cyhoeddi ar y dudalen gwybodaeth am y prosiect ar y wefan hon.

Gallwch weld y dogfennau hyn a gwneud sylwadau trwy lenwi'r ffurflen ar-lein ar y dudalen gwybodaeth am y prosiect ar y wefan hon.

Os ydych yn cael trafferth defnyddio gwasanaethau ar-lein, gallwch anfon gwybodaeth atom drwy e-bost neu'r post hefyd. Gallwch wirio'r wybodaeth am y prosiect yn adran y prosiect ar y wefan hon i ddod o hyd i fanylion cyswllt ar gyfer tîm achos yr Arolygiaeth Gynllunio.

Bydd eich enw a'ch sylwadau'n cael eu cyhoeddi ochr yn ochr â'r dogfennau eraill yn adran y prosiect ar y wefan hon. Bydd eich cyfeiriad post, eich cyfeiriad e-bost a'ch rhif ffôn yn cael eu cadw'n breifat. Gallwch ddarllen ein hysbysiad preifatrwydd i gael rhagor o wybodaeth (sy'n agor mewn tab newydd).

Os ydych wedi methu'r dyddiad cau i gofrestru i leisio'ch barn

Gallwch edrych ar y wybodaeth am y prosiect o hyd. Os byddwch yn cyflwyno gwybodaeth yn ystod y cam hwn, nid oes sicrwydd y bydd eich safbwyntiau'n cael eu cynnwys yn yr archwiliad o'r cais. Bydd yr Awdurdod Archwilio'n penderfynu p'un a ellir ystyried eich safbwyntiau.

Cyngor manylach

Os oes arnoch angen cyngor manylach, gallwch gyfeirio at ein tudalennau cyngor i gael rhagor o wybodaeth.

Darllenwch y gyfres lawn o tudalennau cyngor (sy'n agor mewn tab newydd).

Nesaf Yr hyn y gallwch ei wneud ar ôl i'r penderfyniad gael ei wneud

Rhan o Lleisio'ch barn am brosiect seilwaith cenedlaethol

1. 1 Cymryd rhan yn ystod y cam cyn-ymgeisio

   Y cam cyn-ymgeisio yw cam cyntaf y broses. Dyma pryd mae'n rhaid i'r ymgeisydd ymgynghori â phobl a sefydliadau. Mae'n rhaid i'r ymgeisydd ddarparu gwybodaeth am sut gallwch gyflwyno'ch sylwadau iddo. Mae'n bwysig cymryd rhan yn ystod y cam hwn oherwydd gallwch ddylanwadu ar y cais cyn i'r ymgeisydd ei anfon at yr Arolygiaeth Gynllunio.

   1. Cymryd rhan cyn i'r cais gael ei gyflwyno i'r Arolygiaeth Gynllunio.

2. 2 Cofrestru i leisio'ch barn am brosiect seilwaith cenedlaethol

   I gymryd rhan ar ôl i'r cais gael ei gyflwyno i'r Arolygiaeth Gynllunio, mae'n rhaid i chi gofrestru i leisio'ch barn yn ystod y cam cyn-archwilio. Dyma'r adeg pan fyddwn yn paratoi ar gyfer archwiliad. Byddwn yn amlygu arolygydd neu banel o arolygwyr a elwir yn Awdurdod Archwilio ac yn llunio cynllun ar gyfer y cam archwilio. Bydd y cyfnod cofrestru ar agor am 30 niwrnod o leiaf. Bydd y cam cyn-archwilio'n cymryd tua 3 mis.

   1. Sut i gofrestru i leisio'ch barn am brosiect seilwaith cenedlaethol.

3. 3 Cymryd rhan yn y cyfarfod rhagarweiniol

   Yn ystod y misoedd ar ôl i'r cyfnod cofrestru gau, bydd yr Awdurdod Archwilio'n cynnal cyfarfod rhagarweiniol. Diben y cyfarfod hwn yw trafod y prif faterion y bydd yr Awdurdod Archwilio'n eu harchwilio, a'r amserlen ar gyfer y cam archwilio.

   1. Yr hyn y gallwch ei wneud yn y cyfarfod rhagarweiniol.

4. 4 Lleisio'ch barn yn ystod yr archwiliad o'r cais

   Yn ystod y cam hwn, mae'r Awdurdod Archwilio'n gofyn cwestiynau am y datblygiad arfaethedig. Gall yr ymgeisydd ac unrhyw un sydd wedi cofrestru i leisio'i farn wneud sylwadau erbyn y terfynau amser yn amserlen yr archwiliad. Gall unrhyw un fynychu gwrandawiadau a allai gael eu cynnal yn ystod y cam hwn. Gall yr archwiliad gymryd hyd at 6 mis.

   1. Cyflwyno sylwadau yn ystod y cam archwilio.

5. 5 Yr hyn y gallwch ei wneud ar ôl i'r penderfyniad gael ei wneud

   Pan fydd yr Ysgrifennydd Gwladol perthnasol wedi gwneud penderfyniad, mae cyfnod 6 wythnos pryd y gall pobl herio'r penderfyniad yn yr Uchel Lys. Gelwir hyn yn adolygiad barnwrol.

   1. Beth fydd yn digwydd ar ôl i benderfyniad gael ei wneud?